چيلات الحرامية فشكَهن شد
وانتَ برنو التلمض
على اركَاب الزلم ترعد
ها يسعود..هور الغيم غطه الحد
نسه اطوارة ..... ولانهضن
مساحيك يسون سد
ركس سكان المهيلة
اشجم دله بسماها أهلال.. متشيلة وتفطر اكَلوب؟
هم اللسان ألك وتريد تحجي النوب؟
هم تكَول عندي اجفوف
والزنجار سد الطوب؟
كلشي يصير؟؟
هم صل الحماد انوب ما يكَرص!!
هم صكَر البدو تدوهن ولا يكَنص!!
ها يسعود...؟
ما تردس.....؟
اشجم مطبَك عزف للخير متخورس؟
اشجم شمعة علكَنالك ..
عفتها وأصبحت هندس؟؟
اشجم اربعطعش مرن..
واجن وبنومتك تخنس؟؟
هم فالولة المكروهة ما تكَنص؟
وي يسعود
لا عمة..ولا خوله..
هنيالك دظل نايم..
صريم أفراشك اشطولة
مثل امعاجب الرعيان تتوجه أعلة عاكَولة..
زرعك تلف ناعورة
وحكَك ركس ماطوره
ولو ظليت هيجي تروح
سباحة أبطن خوره
وي يسعود....؟
ما تذكر...؟
ولا عتك حلم خايف؟
نمت وعيون ألك تنطر..
تعد ساعات دنياها وتتوع المر
شنهو العركَل ازنودك يالمشكر......؟
موش انته الهدمت أدول؟؟
موش انته الدفنت الذل؟؟
ها يسعود....لا نخوة
ولا جيله التسرد الغيم!!وتعت الشمس كَوة!!؟؟
ولا جنك...يسمونك صكَر شلوه؟؟
وشل هور المجرة.ولا ماي الصعد علوه!!
هايسعود.....؟
جا وينك......؟
زرزور وتعله أعليك
واندل كل مجامينك!!!
بزلة صبخ من أنهير وتفلش جواهينك
ولا بيرغ حشيم يكد
ولا عايل زلمنة ترد
تره يسعود....جيلات الحرامية
فشكهن شد
وأنت برنو التلمض على ركَاب
الزلم ترعد

زامل سعيد فتاح